June 20, 2024 — Ottawa, ON
Inuit Tapiriit Kanatami ammalu Allangajut Kanatami Katimajingit quviasugutiqartut 100 Wellington Aqqutimi Iglurjuarmit matuinngatittiniarnirminnik aujaq ammalu kikkutuinnarnit ilinniaqtitsilutik Inuit ammalu Allangajuit iliqqusinginnik.
Sanajaujuviniulluni 1932-mi, Iglurjuaq taanna America-miunut Kiggaqtuijiup Allavvigilauqpanga tikitsugu 1999-mut. 2017-mi Kanatami Angijuqqaarjuaq Justin Trudeau tusaqtitsisimalilaurtuq inigijaunialirninganut Iqqilingnut, Inungnut ammalu Allangajunut, katujjiniqarvigilugu aaqqiktausimalirniaqtumut pingasuullutik Kanatami Nunaqaqqaaqsimajuit Katujjiqatigiinginnut – Iqqiliit Katujjiqatigiingit, Inuit Tapiriit Kanatami ammalu Allangajut Kanatami Katimajingit.
Sivulliq natia ilulilik takujagaqarvimit takunnagaliangusimajuttalimit Iqqiliit, Inuit ammalu Allangajut atuqsimajanginnik, piusituqanginnik, aulatsiniqarvigijanginnik ammalu inuusinginnut turaangajunik.
Pigiarluni June 21-mi, Kanatami Nunaqaqqaaqsimajuit Ullungani, 100 Wellington Iglurjuaq kikkutuinnanut matuinngatitaulirniarpuq Pingatsirmit Naattiingujarvingmut 10 ullaakkut 6 unnumut. Iglurjuaq taanna Kanatami Maligaliurvigjuap saanganiippuq ammalu akiqarani isirviugiaq.
Tallimmirmi, June 21, taanna iglurjuq matuinnganiartuq 10 ullaakkut 2 ullumut.
Kikkutuinnait tunngasuktitauvut takujaqtugiaq katajjaqtunik, Inuit pinnguarusinginnik ammalu atirminnik titiraqtautitsijunnarlutik Inuktitut qaniujaaqpaitituurtunik. Allangajuit Kanatami Katimajingit takunnaatitsiniaqput mumiqtunik ammalu piusituqamitigut titiraujagaliurusirminnik.
Inuit Tapiriit Kanatami katujjiqatigiingit katujjiqatigiinguvut 70,000-nut Inunnut Kanatamiunut, amisuuniqsauningit Inuit Nunanganni nunaqaqtuullutik, Inuit nunagijatuqanganni 51-nik nunaliqaqtumi Inuvialuit Aviktuqsimaningani (Nunatsiaq), Nunavut, Nunavik (Quebec Taqranga), ammalu Nunatsiavut (Labrador Uangnangani).
Taakkununga tusaqtitaugiakkannirumajut, qaujigiarunnaqput uvani media@itk.ca